Æðahnútar eru áberandi og óeðlilega útvíkkaðar bláæðar sem oftast myndast í neðri útlimum. Æðahnútar geta einnig myndast við sköp kvenna. Gyllinæð eru æðahnútar við endaþarm.

Helsta orsök æðahnúta er talin vera bilun í lokukerfi bláæðanna auk þess sem slaknar á sléttum vöðvum í æðaveggjunum. Þungunarhormónið Progesteron veldur því að það slaknar á æðaveggjum og blóðstreymi eykst. Æðarnar geta þá stíflast og æðahnútar myndast. Æðahnútar eru algengur fylgivkilli meðgöngu. Oftast finnast þeir á leggjum og í hnésbótum en einnig geta þeir komið fram við endaþarm og í nára. Oft stækka æðahnútarnir þegar líður á meðgönguna og einnig getur þeim fjölgað með hverri meðgöngunni. 

Æðahnútar geta verið án einkenna en algengustu einkennin eru pirringur, bjúgur, þyngsla- og þrýstingstillfinning, breytingar á húð eða langvarandi þreyta í fótum.

Hefðbundin meðferð er regluleg hreyfing, hækka undir fótleggjum og forðast langar kyrrsetur eða kyrrstöður. Teygjusokkar eða eitthvert annað form af ytri stuðningi er einnig gott. Mikilvægt er að klæða sig í þá ÁÐUR en farið er fram úr rúmi að morgni.